Sekretet e bukës së bërë në shtëpi, për fillestaret

Të bësh bukën në shtëpi mund të duket pak e vështirë. Ndoshta e keni provuar dhe rezultati nuk ka qënë ai i dëshiruar. Bukë e fortë, e pa lidhur mirë, e thatë në mes etj, por mos hiqni dorë. Sa më shumë të praktikoheni aq më shumë do të përmirësoheni. Për të bërë bukën na duhen përbërësit kryesor: miell, ujë, maja, kripë dhe sheqer.

Uji

Për të bërë bukën ju duhet ujë i zakonshëm vetem bëni kujdes që mos të jetë shumë i ftohtë. Duhet të dini se kur uji ka shumë klor, dobëson aktivizimin e majasë. Për këtë ju këshillojmë ta zieni ujin dhe ta përdorni të vakët. Ujin mund ta zëvendësoni dhe me përbërës të tjerë, si qumësht, kos, ose ujin ku keni zier perimet. Nëse përdorni qumësht për të zënë brumin ai duhet të jetë i papërpunuar (i pa pasterizuar), pasi pasterizimi shkatërron enzimat e nevojshme për të ndihmuar majanë të bëjë punën e saj. Eshtë e rëndësishme të përdorni ujë të vakët kur bëni brumin, pasi niseshteja nuk tretet mirë në ujë të ftohtë.

Mielli

Nëse jeni fillestar, ju rekomandojmë të filloni së pari ta zini brumin vetëm me miell të bardhë, më pas të kaloni në përzierje apo miell integral. Pasi të jeni praktikuar disa herë, do të arrini të bëni bukë perfekte dhe shumë të shijshme. Nëse përdorni një lloj të veçantë mielli të quajtur grano duro, i cili përmban më shumë proteina, buka juaj do të jetë edhe më e shijshme.

Majaja

Majaja është përgjegjëse për aromën karakteristike të bukës. Brumi që vjen ngadalë, për një periudhë të gjatë kohe shndërrohet në bukë të shijshme, të butë, të lehtë dhe të pasur. Nëse brumi vjen në një kohë shumë të shkurtër, shija e majasë do të ndihet shumë në bukën tuaj. Ju mund të përdorni ose maja të thatë, pluhur, të disponueshme në qese të vogla, por ne ju rekomandojmë maja të freskët. Buka më e mirë bëhet me maja të freskët të shitura në kube të vogla. Majaja zhvillohet më mirë në temperature ambjenti nga 30°C deri në 35°C, kështu që është e rëndësishme që të gjithë përbërësit të jenë me temperaturë dhome si dhe të përdorni ujë të vakët.

Kripë

Kripa i jep bukës shije. Kripa e detit është zgjedhja më e mirë, pasi është e pasur në minerale. Kripa rregullon rritjen e majasë, prandaj përbërësit përzihen sipas renditjes dhe jo të gjithë në të njëjtën kohë. Nëse po bëni bukë me miell të pasitur ose miell integral, përdorni pak më shumë kripë, pasi do të përmirësojë aromën e bukës.

Sheqer

Sheqeri ndihmon në aktivizimin e majasë. Pa sheqer, majasë do të duhej një kohë shumë më e gjatë për të filluar përpunimin e niseshtës në miell, gjë që do ta bënte kohën e ardhjes së brumit shumë më të gjatë. Mund të përdorni ëmbëlsues të lëngshëm si psh: shurup panje, mjaltë ose melasë, ose sheqerin e zakonshëm.

Përzierja e brumit

Të gjithë përbërësit duhet të jenë në temperaturë dhome, nëse ato janë shumë të ftohtë, majaja nuk do të aktivizohet. Sigurohuni që në fund të shtoni pak kripë dhe vaj në përbërësit e tjerë, përpara se të filloni të punoni brumin.

Punimi i brumit

Në filim, brumi do të jetë ngjitës, por sa më gjatë ta punoni atë, aq më i butë dhe më elastik do të bëhet. Dhe si ta dalloni kur është gati? Kur bëhet i butë si lëkura e një bebeje. Ka shumë mënyra për ta punuar brumin. Më e zakonshmja është ta shtypni brumit me të dyja duart duke e shtyrë, më pas ta ktheni dhe të bëni të njëjten gjë disa herë. Punimi i brumit duhet të zgjasë të paktën 5 - 8 minuta, ndryshe e përkthyer në numra 200 shtypje.

Ardhja e brumit

Eshtë e rëndësishme që të kontrolloni herë pas here ardhjen e brumit. Nëse buka po fryhet shumë shpejt, nuk do të ketë shije aq të mirë. Nëse rritet shumë pak ose nuk vjen siç duhet, do të përfundoni me një strukturë jo elastike dhe të fortë të bukës. Sa më i freskët të jetë ambienti dhe përbërësit, aq më gjatë do të zgjasë proçesi i ardhjes së brumit - dhe anasjelltas. Në çdo rast, koha e ardhjes së brumit nuk duhet të jetë më e shkurtër se gjysëm ore. Dhe si e dini kur brumi ka ardhur aq sa duhet? Shtypeni atë me gisht - nëse brumi nuk zhytet në të dhe vrima e bërë me gishtin tuaj mbetet në brumë, është në rregull. Sidoqoftë, nëse brumi mbush vrimën dhe zhytet brenda, kjo tregon se është lënë për një kohë të gjatë.

Pjekja

Pjekja e kthen brumin në një bukë të shijshme, me aromë të mrekullueshme. Pasi të piqet buka, aroma e njohur e bukës së pjekur fillon të përhapet nga furra në të gjithë shtëpinë.Dhe si ta dallojmë kur buka është pjekur sa duhet? Një bukë më e madhe sigurisht që ka nevojë për më shumë kohë për tu pjekur sesa simitet e vogla. Si e dallojmë? E nxjerrim nga furra dhe trokasim në fund. Nëse tingulli është bosh, buka është pjekur mirë. Nëse jo, e vendosim përsëri në furrë për disa minuta. Nëse vendosni një enë të vogël me ujë në fund të furrës gjatë pjekjes, korja e bukës do të jetë më e shijshme dhe krokante. Ose mund të spërkatni pak ujë në furrën e nxehtë përpara se të vendosni bukën në të. Dhe kjo do ta bëjë koren të shijshme. Temperatura për pjekjen e bukës varet nga lloji i furrës, si dhe programimi. Nëse ju po e përdorni pjekjen me ventilim, temperatura optimale është rreth 180°C, ndërsa në programim të zakonshëm, duhet 200°C - 225°C.

Ftohja

Kur e nxirrni bukën nga furra, duhet ta mbështillni me një pecetë të pastër kuzhine dhe ta lini të ftohet për pak minutat. Në këtë mënyrë buka nuk do të jetë e lagësht dhe nuk do të ngjisi në fund. Buka duhet të jetë ftohur mire para se të filloni ta konsumoni, përndryshe, ajo mund të shkërmoqet dhe t’ju ngjitet në thikë. E dimë, është tundim i madh ti rezistosh bukës së ngrohtë dhe aromës së saj. mmmm Pjekja e bukës nuk është aq e vështirë, por kërkon pak vëmendje. Nëse përpjekjet tuaja të para dështojnë, mos u dorëzoni - praktika do t’ju sjellë përsosshmërinë! Sa më shumë të provoni, aq më shumë do të mësoni dhe me kohën, do të zhvilloni aftësitë tuaja për të bërë bukën.

RECETA BAZIKE E BUKES

• 2 gota ujë të ngrohtë
• 1 lugë çaji mjalt ose 1 lugë gjelle sheqer kaf
• 1/3 e pakos së majasë
• 5 gota miell i bardhë
• 1 gota miell i pasitur
• 1 luge çaji kripë
• 1 luge vaj ose gjalp i shkrirë

Përziejmë sëbashku ujin e ngrohtë dhe ëmbëlsuesin (shurup panje ose sheqerin) në një tas të madh. Shtoni majanë e thërrmuar dhe përzieni me ujë. Lëreni të pushojë për rreth 5 minuta. Nëse majaja është e freskët, do fillojnë të shfaqen flluska.

Shtoni me ngadalë miellin në përzierjen e ujit dhe përdorni një lugë druri për të kombinuar përbërësit. Pasi të keni shtuar 2 gotat e para, shtoni kripën, pastaj shtoni miellin e mbetur. Nëse brumi është shumë i thatë, shtoni pak ujë dhe nëse është shumë i njomë, shtoni pak miell.

Punojeni mirë për të paktën 5 - 8 minuta. Spërkatni zonën e punës dhe brumin me pak miell për të mos lejuar ngjitjen e tij.

Vendosni brumin në një tas të lyer me pak vaj dhe mbulojeni me një leckë kuzhine. Lëreni brumin të vijë. Mund ta mbuloni dhe tasin me kapak, vendoseni brumin në frigorifer dhe lëreni të vijë ngadalë gjatë natës.

E shtypim brumin e ardhur dhe bëjmë dy bukë ose bageta. E shtrojmë brumin në tavën që do ta pjekim dhe e lëmë të pushoj dhe 30 minuta në temperaturën e dhomës. Mos harroni, mos hapni nodnjë dritare ndërsa brumi po pushon, në mënyrë që të mos "ftohet" - siç do të thonin gjyshet tona. Ngroheni furrën në 200°C.

Vendoseni bukën në furrë dhe uleni temperaturën në 180°C. Piqeni për 20 - 30 minuta ose derisa buka të piqet mirë. Gati dhe shijojeni!